新節目《講你都唔信》 曾志偉出山做主持

無綫總經理（節目內容營運）曾志偉與錢嘉樂主持的全新綜藝節目《講你都唔信》，將於明日起，逢星期一至三晚播映，昨日二人聯同丁子朗、林秀怡與黃婧靈（波波）等出席於將軍澳電視城舉行的拜神儀式。

志偉表示節目構思是因為之前政府有全民檢測計劃：「萬一要禁足、閉環，我哋都要作出準備，提供資訊娛樂畀觀眾，所以諮詢過藝員及工作人員，邊啲願意閉環式留守，結果好多人報名，今次呢個節目就當係預演，亦都畀市民習慣吓，自己當然要身先士卒留低陪大家一齊主持節目，所以就有呢個構思，即刻打畀大師兄（錢嘉樂），我同嘉樂係鐵腳之外，每晚都會有唔同主持，暫定拍3星期，（之前流傳話有8個環節？）其實唔只8個，但如果政府唔禁足，我哋都冇需要閉環。」

他又笑言重出幕前都擔心觀眾是否認得自己，問到他出山做節目是否要救收視？志偉笑言無須要救：「冇嘢要救呀，我救返自己咋，我都有少少蠢蠢欲動想出嚟做，因太耐冇做，自己都有興趣做返獎門人節目，但唔想被人話我又用獎門人去打人，所以一直冇做，因為今年係無綫55周年，又係獎門人25周年，港姐又40周年，可能下半年有好多大型節目，獎門人都會出嚟玩吓啦，（有冇收視壓力？）冇，現在個個留喺屋企，其實啲節目收視好好，我驚我出嚟做節目個收視唔好，其實最緊要同觀眾渡過疫情難關，希望呢個時間每晚畀歡樂大家，陪大家傾偈，呢個先係做呢個節目的初心。」

志偉又透露原本閉環，節目就會做直播，但現在不用閉環就改為錄播，今日錄影翌日播，可貼近時事。問到是否要出動人情牌邀請嘉賓？他笑說：「唔使人情，佢哋個個都出糧，好感動好多人自動報名，有六七十人。（你會唔會率先體驗閉環？）我同閉環冇分別，晚晚天光至走，如果閉環好多嘢要解決，都有諗過閉環就喺露天停車場搭帳篷畀大家瞓。」